الشيء اللطيف هو أن البنات يعتقدن أن للرجال القدره على تفسير الطقوس الخاصة بهم للوصول إلى شيء ما .. وهذا الشيء ببساطة هو "أنا متاحة للزواج يا أحمق" .. اما الشيء الاكثر لطفاً أن الرجال لا يعلمون البته هذه المقاصد .. وقمة اللطف في الموضوع أن الرجال يأخذون هذه الطقوس بمعنى آخر تماما يروق لهم ولو علمت به النساء لضربتهم بالجزم .. أما ما يثير الضحك حقا أن البنات يعلمن بنوايا الرجال الأخرى ورغم ذلك يستمررن في ما أسمية طقوس رقصة البجع!! ..
حسناً .. لم أجن بعد وإن ظننت ذلك فلا ألومك حقاً .. ولكن أعتقد أن لدي داع لأقول ذلك .. فمن سوء حظك ان تكون مكاني وتذهب إلى عرس بصحبة بعض من أقربائك حيث الكثير من جحيم الضوضاء والألوان والحناطير والعنب مع بعض من الإبتهالات الدينيه التي لا أدري كيف تم حشرها في الموضوع .. وقد تكون سعيد الحظ وتسمع بعض النصائح عن سجائر الحشيش التي سوف تخرب بيتك ..
أما الخبر السعيد فأني قد كسرت قاعدة عدم ملاحظة الرجال لرقصة البجعه ولاحظت - للمرة الأولى - أن البنات فقط يلفون في دوائر حول العريس والعروسه في الزفه !! .. واكتشفت عبقريتي لأني لاحظت أنهن ما زلن عازبات .. منين؟ من خواتمهن طبعا حيث يتعمدن وضع خواتم مجعلصة في اليد اليسرى واليد اليمنى فارغه .. فلاحظت احدى قريباتي نظراتي .. فقالت في خبث بعد أن لمعت عينيها بتلك النظرة والنبره الساخرة "ها مش ناوي بقى .. شكلك مركز" .. صارحتها بما يدور في ذهني عن رقصة البجع .. فشرحت لي ببساطة -وتعجبت بمدى جهلي - العديد من الأسرار التي لم افهمها قط!! ..
أبسطها رقصة البجعة حيث تلتف البنات العازبات حول العروسين يعلنون في فخر "أنا هنا للزواج" .. وبعضهن "أنتوا اتصتوا في نظركم؟؟ .. ماما خلتني اغير الفستان ده عشر مرات وقعدت تضيقلي فيه تلات ساعات عشان أبان احلى وحده وتبصوا ومتجيش وحده تانيه تاخد الجو مني الله يعميكم ..دا انا حاطا طن مكياج وجنبه .. " .. ولأن الرجال حمقى ولهم افكار وتخيلات اخرى تماما بعيدة عن تصورات البنات عن الزواج .. فإن امهات الشباب يضربون اولادهن لكي ينظرن إلى البنات (كويس وبتركيز) ليتزوجوا إحداهدن ليخرجوهم بذلك من عالم أفكار وتخيلات أخرى تماماً .. أيون .. أفكار أخرى تماما لا علاقة للزواج بها .. اسمع إحداكن تقول ونظرة انتصار مبكرة تقفز من وجهها "بس في واحد شاف وحده من الفرح وخطبها" .. في الواقع ديه أمه الي وزته .. أو حاجة تانيه .. انه انجرف ورا .. افكارة وتخيلاته (ده كلامها على فكره عشان أنا سألت نفس السؤال)..
الحقيقة إن البنات في اليوم ده بتحاول بقدر الإمكان تجمع ما بين البنت المحترمة المحجبة المؤدبة الي هتسعدك يا ابن الحلال .. أنا بنت ناس أوي ومتدينه .. انت مش شايف الحجاب؟!.. وفي نفس الوقت بتلبس فستان السهرة بيبقى ضيق جدا وبترتر وفي حجاب لازوم أنا مؤدبة .. وبعد اللفه في الزفة ياتي الكبير .. بيجي وقت وصلة الرقص .. لأ.. دي غير رقصة البجعة .. لكن بعيدا على الرقص كنت بلاحظ ان البنات بيحصل بينهم في الكواليس خلافات على الانفراد بالساحة ..واضح ان الموضوع مهم وان كان ليه تاثير عكسي تماما .. إذ بيزود جرعة التخيلات ويقلل نسبه الجدية في الزواج عند الشباب .. حلو كده .. كفايه اوي .. أنا عكيت الدنيا ..
يخبر .. اتكلمت كتير ونسيت اقولكم عن الغرض وراء روايتي لرقصة البجع .. حيث في مناسبة اخرى ذهبت لعرس مع اصدقاء ولكن المرادي شباب بس .. قمة البوظان يعني .. فلما بدات رقصة البجع رحت ميلت على زميل ليا عايز يخطب "يلا نقي يا باشا ".. المهم انه بعد الفرح سالني عن سبب الجمله .. فشرحتله الطقوس.. فرد عليا " انت فعلا بتتكلم صح ديه عامله زي مراسم التزاوج عند البجع في قناه ديسكفري .. البجعه بتستميل البجع بالرقصات!!" .. الحمدلله مش انا الوحيد الي حسيت كده !! .. واكتشفت ان لا هوا ولا الخمستاشر واحد الي معايا فاهم رقصه البجع ولا الإشارات ولا تظبيط الامهات ولا اي حاجة والمصيبة إن كان فيهم متجوزين !!.. الفرق بينا وبين البجع ان البجع فاهم ومستعد يشاهد الطقوس للجواز و(يتجوز!!) .. لكن الشباب بيشوف الطقوس لأغراض اخرى!! لدرجة إن البنات صعبت عليا من كتر المجهود الي بيعملوه وبيطلع على فشوش .. كل الي عملوه انهم .. زودوا عند الشباب .. مخيلاتهم وافكارهم ..
إن كيدهن عظيم (الجزء الأول) , (الجزء الثاني)
Posts
21 Comments:
ههههههههههههههههه
منك نستفيد
الصراحة انا اول مرة اعرف الموضوع ده
اممممممممممممم
طب يعنى انا كده مش من كيدهن ولا ايه
بس انا بجد بشوف الموضوع ده هيافه فعلا
يعنى ايه اروح فرح علشان عريس ؟؟؟
طب انا قصاد نفسى يكون منظرى ايه يعنى
ما علينا
اللى يعيش يااما يشوف من حركاتنا
^_^
كل ربيع و انت بخير بقى
ايش ها الكلام الزين
اسلوبك جميل وساخر
طبعا انت فتحت علي نفسك فاتحة محترمه
انت كده أفسدت المخططات الرهيبة
وكشفت الستار عن الاسرار
@ Sweet Violet
هوا واقع وربما فعلا هيا طقوس لكن بتتعمل فعلا
:D
تحياتي جدا نورتي البلوج
@fAHD
اه مهو ده فعلا حصلا بس نعمل ايه
ان كيدهن عظيم
نورتني
:)
looooooooool 3aref kan fei youm kolo matara webahdala , kan fara7 wa7da sa7betyy m2dertesh awsal elfara7 bas lahezt en mo3zam aw koll elly rahooo 3azebat zay mabt2ool welly e3tazaroo kanoo makhtobeen aw metgawezeen :D:D.. de7ekt l2enny fahma ra2set elbaga3 lama 2areit-ha bas msh kont a3raf en esmaha keda :D
@Anonymous
:D
هوا انا سمتها كده عشان فعلا بتفكرني بقناة ديسكفري
بس الحمدلله مطلعتش عارف الموضوع لوحدي
تحياتي
مع تحفظي طبعا على اسلوب البنات في الافراح واللبس الضيق واللذي منه مش كل البنات نيتهم زي ما انت بتقول كده بالعكس ده كبت بعيد عنك مابيصدقوا يلاقوا فرح يخرجوا الكبت اللي عندهم ده غير ممكن تكون بنات فرحانة لصحبتها العروسة وبتعبر عن فرحتها بوجودها جمبها طول الوقت في الفرح بلاس الافكار دي عن البنات لاتتحامل عليهم
تحياتي ربنا يوعدك بواحدة مش بتاعت تخطيطات للافراح
@شيرين
اكيد انا مش بعمم طبعا
بس لحسن الحظ لو البنت ليها في تخطيط الافراح مش هتقدر عشان مش بحضر افراح
:D
تحياتي
ماشاء الله يا أحمد, إيه الإبداعات دي
بصراحة انا مفروس من نجاحك الأجتماعي والعملي عشان كدا انا لازم اديك تعليق يضيقك من واحد فاشل ملوش اي نجاح وكمان عشان اجذب اهتمام البنات زيك كدا ويعلقوا عندي اصلي مكبوت وعامل فيها مبحبهمش انت عارف بقى خلصنا خد التعليق بقا
انت هتموت يا احمد هتموت وكل دول مش هيفتكروك اصلا اقفل فيلم الكارتون الي انت عايش فيه ده واعرف ربنا خلقك ليه
لو فكرت في يوم القيامة وبلوجك دا وحياتك الي فتنت فيها بالدنيا هتحس بالتفاهة صدقني
@Hewedy
تسلم يا حبي .. انت انسان زوق زوق زوق
:D
نورت
@Anonymous
ممكن في حالة اخرى كنت مردش بس عامة عندي سياسة بتبعها خاصة في البلوج عندي .. انا مش برد رد جارح على حد لان مفيش والله حاجة تستاهل .. وعامة انت نورتني وهرد عليك كمان
:)
بس يا سيدي .. هوا تعليقك ده فرحني .. عارف ليه .. عشان المقوله بتقول اذا ركلك من خلفك فاعلم انك في المقدمة وده شيء كويس .. وعادي جدا
ثانيا ياسيدي ولا تتفرس من نجاحي ولا حاجة .. كل شيء بيد ربنا والتوفيق من عنده .. والحمدلله ربنا رسملي طريق كويس مليش يد فيه .. الحمدلله .. ربنا بيشيل من ناحيه ويعوض من ناحية .. اهم حاجة تحسن الظن فيه ديه بالدنيا
وواضح انك تعرفني شخصيا لانك علقت على مستواي الاجتماعي والعلمي وعارف قد ايه انا طفل في موضوع الكارتون ده
بص يا عسل .. انا مستعد اقعد معاك ونحاول نظبط الدنيا مع بعض .. ومش هزعل والله منك .. في قاعده اتعلمتها انك كل ما تعلم حد ربنا بيزيدك .. وكل ما تدي ربنا بيديك .. ده عن تجربه .. فلو شخص قريب فالاقربون اولى بدال ما روح لبعيد
:)
اما بالنسبه للبلوج
فمش هقفله .. انا بحب اكتب .. ومعرفش انت تسمع عن الفن الساخر ولا لا .. بس عامة انا معظم كتاباتي بيه .. وهتلاقي الغرض من كل بوست شيء كويس في اسلوب ساخر ظاهره شيء وباطنه شيء.. ده مثلا بتكلم عن بعض الحجات الغير لائقه في الافراح بس للي يقرا ال بين السطور
وشكرا على نصحتك اني لا التفت للدنيا اوعدك مش هبصلها بقدر ما استطيع مع مراعاه طبعا ان ربنا امرنا بالسعي والعمل وجني المال والتعليم والمتعه وكل شيء .. ومع كل ده نتقي الله ونعبده
فربنا معاك ونورت البلوج واسعدتني بتعليقك
:D
انت بتجيب الكلام ده منين ؟!! ههههههه
جايز فيه بنات كده بس ما افتكرش انهم كتير ولا بالصوره الرهيبة اللي انت بتوصفها .. كأنه البنت ما وراهاش حاجه يا عيني غير انها تحط ايدها على خدها و تستنى اي فرح تنزل تعمل فيه رقصة البجع اللي بتقول عليها دي
!!
لو ده بقى تفكير الشباب و تفسيرهم عن البنات يبقى عليه العوض و منه العوض في كل أجيالنا
:D
اللي أعرفه انه لما كنت اروح فرح كانوا يعزموا عليا نقوم جنب العروسه و ممكن نلف حواليها مجاملة لها عشان نفرحها في اليوم ده و تحس انه صاحباتها جنبها .. لا في دماغنا شباب ولا موسم تزاوج ولا ديسكفري
:D
لو عقل الشباب بقى بالفظاعه دي و مصدقين نفسهم كمان و بينقلوا الخبر لبعض كأنه اكتشاف يبقى أنا هاحرم أقوم في أي فرح تاني جنب صاحبتي منعاً للافكار العبقرية دي
:S
أما حكاية اللي تبقى محجبه و تلبس ضيق دي معاك حق فيها لانها بتبقى حاجه مستفزه .. و الاكثر استفزازاً شفت مره في فرح رحته وحده محجبه و بترقص فيه .. ومش أي رقص ده رقص بلدي أندر إيرث
:D
شكرا على الموضوع .. فات شهور و مانزلتش موضوع تاني بعده .. يا ترى ليه ؟
:)
@Zo0oZ
اولا شكرا على سؤالك وجزاك الله خير ..انا مشغول شوية .. شويتين تلاته في الشغل
بس فعلا الي في البوست ده مش من تاليفي ده وحده قالتلي عليه وكانت مستغربه ازاي انا مش فاهم .. كان ناقص تقولها انت منتكس الفطره ولا ايه
:D
عامة التعميم جهل ومعاكي حق مش كل البنات كده .. بس في كده ..وكتير على فكرة .. الاهتمام بالمايك اب المبالغ فيه والالوان الملعله والترتر والجبنه ومشتقتها
:)
اشكر تواجدك بشده وان شاء انزل حاجة قريب
شكرا على البوست
ايه ياعم !
انتا حد مصلطك عليهم ولا ايه ههههه
لابجد ملاحظاتك سليمة وذكية واسلوبك سلس اقبل تحياتى ومرورى
مع احترامى لشخصك لا اكتر ..انا اتكعبلت في مدونتك المهجورة .اثنا بحثى عن كلمة " خير : على جوجل..ولا ادرى اين الخير
ولانى بنت ولاول مرة اعرف حوار رقصة البجع ..بس اسلوبك التهكمى استفزنى للاسف ولا ارى سواء للاسف انك لو مكنتش خطبت لاصبحت من فئة انيس منصور عدو المراة وصدقينى كنت لقيت تجمهر رجالى يساندوك ..بس للاسف هناك بعض التدوينات ابعد ما تكون ان تعبر بها عن طبيعة المراة
وما اعرفش ايه كم الاسف الى انا كتبته..بس يلا
@يوميات شحات
اي خدمة يا جميل .. نورت
:)
@عباس
ده شرف ليا رايك .. بس خلاص ان خطبت ومعدش في امل اني اتصلط عليهم
:D
تحياتي
@fatima qandil
يا أهلا أهلا
:)
ايه السخونه ديه
:D
عامة يا ستي .. انا بحب اكتب باسلوب ساخر .. ولاذع كمان .. ناس كتير مش بتقبل الاسلوب ده رغم انه بيحاول يوصل فكره بشكل مختلف شويه .. بس انا بفضل اكتب كده وده اسلوبي .. وناس كتير بيعجبها
:)
وبعدان عدو مرأه ايه بس .. دا الي اخر حاجة تتقال في البوست ده ..
:D
ونورتيني