أنا مش عارف البنات عايزة ايه بالظبط؟؟!! أساتذه في التلون .. لأ وأيه .. تقنعك ..
وفي الأخر تتكشف انهن .. يتمنعن وهن راغبات !! .. أو - على رأي واحد صحبي - يتدلعن وهن عايزات !! ..
لما رحت في زيارة لأحد الأقارب إذا بالمدعوق إلي ينشك في قلبه طموره حصني قرر يشرف بسلامته في التلفزيون في الفيلم بتاع الحاج عمر والأخت سلمى .. ومكنتش محتاج أعرف لأن حظيرة الأغنام .. إحم الأطفال وخاصة البنت الصغيرة ماسكة الروموت وبتزووووم:"يووووووووووة يا ماما مش كل ماآجي اتفرج تنزليني أجيب حاجة عمر وسلمى هيبتدي!!" ..
أعوذ بالله .. هو المزغود في قلبه مجاش غير دلوقتي .. على دخلة خالة الأطفال :"ايده أحمد عندنا.. هل هلالك إزيك " .. الحمدلله كويس .. المهم قعدنا نجيب في سيرة مخاليق ربنا حبة .. لحد ما ابتدى الفيلم .. لقيتها بصتلي بقرف :"يا دي طامر حصني إلي البنات ميته فيه ده .. مش عارفة على ايه .. بص بص ده مركب مقشه في حواجبة .. وإيه شعر صدرة إلي فرحان بيه ده " ..
مكنتش مصدق !! .. ايه ده هو فيه بنت مش بتحب طمبوره؟؟ .. اتبسطت إن في حد معايا .. فكملت أنا شتيمة :" ده رد سجون .. مش عارف البنات تحبه إزاي !! .. ده واد تافه جدا" .. ردت "أه والله .. هو البنات دلوقتي هتفكر إن ده رد سجون" .. طبعا البنت الصغيره بصتلي بصه الي هيا أقلها انت كفرت خلاص ابقى سلملي على ابليس في جهنم يا بعيد !! ..
شوية ياخويا طول الفيلم كل ما تطلع بنت مي ولا ميس ولا غيرها الاقيلك الصغيره والكبيرة الي تقولك روحي وانتي ماسخة .. كل ديه مناخير .. ديه معفنه إيه كل المكياج ده .. يوووه بقى في إيه .. خلاص يا جماعه خلقه ربنا .. لحد ما الست مي عز الدين ظهرت لقيتلك الصغيره نطت من العلبه وصرخت "إنتي جامده الله يخرب بيت أهل إلي جابوكي" .. بقيت مش عارف ده مدح ولا شتيمة ولا غيرة ولا ايه.. شويه يا خويا .. ولقيتلك خالتهم دخلت في الخط عماله تحكيلي : بص هيحصل إيه .. الحته ديه حلوة .. خلي بالك من الحته ديه .. هوا فيه إيه؟؟ .. انتي حافظة الفيلم ولا إيه!! .. مش ده الواد رد السجون!!..ده في عقل بالي طبعا .. وتضحك .. يوة .. وشويه لما مي طرقعت لطمبورة على قفاه قالت :" روحي أنتي متستهليهوش " .. هو في ايه بالظبط .. لحد ما أنا اتخنقت .. والعيال عمالين يتنططوا ويعلوا التلفزيون .. ودوشوني .. قمت خدت الرموت وحولت القناة!! .. والرجاء اشتغل بقى :"عشان خطري يا عمو أحمد .. ده عمر وسلمى وبنحبة" .. هيا وأخوها .. قلتلهم :" عشان تبطلوا قله أدب انا قلتلكم اقعدوا على الكنبه وانتوا مسمعتوش الكلام " .. ورحت جبت ماتش في الدوري السويسري متعاد واقعدت اتفرج عليه .. وهما شغالين ذل لحد ما زعقت فيهم الزعقه المتين الي مضمونها "جواب نهائي" .. لو جيه جورج قرداحي بنفسة برضو جواب نهائي ..
بصيت لقيت خالتهم بتقلي معلش رجعلهم القناة .. بصتلها كده بصه خبيثه معناها "إيييييه .. انتي كمان؟؟" .. خدت بالها وقالتلي بربكة كده انهم مستنينه من بدري وحرام .. حكمت دماغي واتفرجت على الماتش برضو .. سابوا الاوضه وراحوا يلعبوا بره ..
خلص الماتش على حظهم قلت ارجعوا تاني بشرط يسمعوا الكلام .. احسن يدعوا عليا .. لقيتهم اترصصوا وخالتهم برقت وكأن الأكسجين ملا الأوضة بعد إنقطاع!! .. ونفس السناريو تاني بص يا أحمد الحتة دية .. وتبص بقى على اللقطات الرومنسيه وطمبوره وهو عايز بوسة في العربيه .. وهما هيمانين .. ولما اتجوزوا وقطعوا التورته السبعين دور كانوا خلاص جالهم من الدموع جفاف!! .. حتى انا فكرت ساعتها .. لما البنات بتتفرج على حاجات زي ديه وشايفه طمبوره بالفرح والرومانسيه ديه طبيعي يرفضوا العرسان .. ده لو في أصلا عرسان!! .. الصنف مضروب في السوق اليومين دول وإلي بتلاقي أصلا ديه مبخته.. بفكر نستورد عرسان ..
ولما الفيلم خلص لقتلك الدموع نازله وبصتلي :" الجزء التاني بقى أحلى من الاولاني تمورتي فيه عسل ودمه خفيف خالص عندي على الكمبيوطر كله ضحك" وقامت حكياه ليا .. تقريبا طمورة إلي بتتكلم عليه غير رد السجون إياه ..
طب لما انتوا ميتين عليه كده قولوا وخلاص .. مش لازم تعملوا فيها مثقفين ومعارضين وخلاص .. صحيح .. يتدلعن وهن عايزات .. والله الخواجة جون جراي لما قال كده في كتابه "الرجال من المريخ والنساء من الزهرة" مكدبش ..
Posts
12 Comments:
يا سلام على الدياثة مش مكسوف وانت قاعد جنبهم بتتفرج وبتحكي على المشاهد الرومانسية ولا انت عايز تكتب اي حاجة وخلاص
شكرا يا فندم ..
اولا
قال الله تعالى(( ولو كنت فظا غليظ القلب لانفضو من حولك)) آل عمران
ثانيا
هل انت عارف انا عملت ايه بعديها وانا اسلوبي في العلاج كان ايه؟
ثالثا
الحل الجذري ليه عواقبه ولا بد من الاقناع .. لانك بعد ما تقفل التلفزيون وتمشي هتشتغل القناه تاني
رابعا
عشان تعرف تفكيري اقرا البوست ده
http://ahmedmmubarak.blogspot.com/2008/01/blog-post_10.html
عامة شكرا على ذوقك
العالي جدا
وياريت تشرفني تاني يا فندم
وجميل اوي اسلوب الدعوه إلى الله ده بالطريقه ديه
ونورتني
موب يا جامد
هم ف أزرينا سايبينك تروح عند قرايبك وكمان تتريق على طمبورة
انا هكلم الاتش ار اللي عملتلي انترفيو ف تلت دقايق وطلعتني غير لائق من عندكو تظبطك
غير لائق ده يبقى ايه يا حبي
يبقى
..........
يعني لازم تحرجني
ما احنا قلنا غير لائق يعني اوفر كواليفايد يا برنجي
وبطلوا قر بقى خلوني ارتاح شويه
:D
ههههههه
مالها المكنسه يا احمد طيب والله زي العسل
انا عن نفسي بحب تامر بصوته باغانيه بافلامه بغباوته بكل حاجه :))
وعمري ماقلت عكس كده او ابديت رأي غير ده
انا اه مش هو مطربي المفضل ولا انا واحده من بتوع التيموريه اللي بيموتوا ف دباديبه بس انا شايفه انه انسان عسول ومقبول وبيضحكني :) واحيانا بيبكيني
يعني بحبه بردوا
مممم
ولا اتمنع ولا اتنيل ع عيني
انما البنات اللي بيتكلموا ع تامر مش كويس قدام ولاد يبقوا حاجه من اتنين يا ديابيه يعني بتوع عمرو يا اما عايزين يعجبوا الواد هيهيهي
@MǿиY El-Shreef
بتحبوا تغيظوني انتو
ماشي كويس انك صريحة ديه قليله اليومين دول
:D
ما علينا
لابنا يرحمني منه
تحياتي
بطل تنم يااحمد على مخاليق ربنا هههههه
@شرين
مهو لازم ننم علشان نكتب حاجة
:D
هههههههههههههههههه
عادى
ده تامر حسنى
هههههههههههههه
و المصيبة ان البنات اللى من 8 سنين و طااااااااااالع بيحبوه موت
انا مش فاهمه على ايه الصراحة
هههههههههه
@ واحدة مفروسة
اه مهو الموضوع ده فارسني اخر حاجة
:D
يلا ربنا بهدي
نورتي البلوج
ولا أي راغبات على فكرة :D
أحب أبشرك إن في آلاف مبيعترفوش بيه ، بس مبيشغلوش وقتهم بالكلام عنه
@ Safa
اهلا بالزائرة في البلوج
البلوج نور
اسمحيلي اتفق معاكي تماما
تحياتي