تصدقوا بالله .. إحنا فعلا نستاهل إلي ربنا يعملوا فينا من الحكومه والشارع والغلو والشقق الغاليه والقتل والإعتداء على البنات وكل البلاوي ديه!! .. لان بجد إحنا شعب منستاهلش ..
بنقعد نتحسبن ونشتم وخلاص طول ما إحنا في موقف ضعف .. ونكون مساكين .. لكن أول ما نقدر بنفتري .. أنا مش بتكلم على حاكم او محافظ .. أنا بتكلم على أبسط واحد في الشعب ..
ليه كده ؟؟!!
فعلا سواقين الميكروباصات بيفهموا وعندهم حق يعاملونا زي الزفت!! .. لأن لو عاملونا بإحترام هناكلهم ..
والله العظيم في سواقين ميكروباصات محترمين جدا عن ناس ببدل .. أنا بتكلم على الأخلاق والمعامله ..
بنشتكي من معامله سواقين الميكروباصات إلي بيعاملوا الزباين زي الغنم ..
طيب لو سواق الميكروباص عاملك كويس .. هل هتعامله كويس ؟؟
اليوم خرجت بدري كنت رايح مشوار لمدينه نصر .. الساعه 7 الصبح .. ومفيش شغل ويوم اجازه يعني الشوارع هيو خالص .. ولحسن الحظ لقيت ميكروباص بيحمل .. ومن ضمن الركاب ركب راجل كبير في أوساط الخمسينات لابس بدله وشكله محترم جدا ..
فلمينا الأجره من بعض .. وواحد كان معاه عشره اديناله الفكه ومتبقاش غير الراجل أبو بدله وكان معاه عشره .. مش جريمه إن معاك عشره .. ولا جريمه ان السواق ميكونش معاه فكه ..
والطبيعي أن سواقين الميكروباصات بيقلك لو مش معاه ومش عارف يتصرف يرجعلك الفلوس بقمه الإحتقار ويقلك -"شفلي فكه يا برنس إحنا أول دور انتوا هتقرفونا على الصبح ".. ورد الفعل إن الي دفع بيخاف وبيطلع فكه او بيدور فكه من إلي في العربيه ومش بيفتح بقه ..
لكن المرادي كان السواق شاب محترم جدا وبسيط جدا .. قاله -"يا حج اتفضل شفلي فكه لان إحنا لسه طالعين ومش معانا فكه" ..
وكأن أبو بدله لما شافه محترم قال ده صيده وقام مزعق وقلب وشه وكأن السواق كفر:
-"وأنا اعملك ايه يعني ان شغلتي أفكلك .. مش معايا فكه اتصرف ولا فك من حد من زمايلك .. أنا مالي .."
والسواق بكل هدوء قام قله والله بكل إحترام:
-" حضرتك ده أول دور .. وانا والله وأنا سواق وانا رايح استلم العربيه باخد فكه علشان المواصلات علشان عارف الصبح مفيش فكه ..الناس لسه بتتصبح"..
والراجل أبو بدله فضل يتكلم بطريقه سيئه جدا معاه كأنه أجرم..
ليه كده؟؟؟ ..
هوا علشان السواق محترم وكلمك بالراحة تقوم متحترموش؟؟ هوا ده مش بني أدم زيك؟؟ مين اداك الحق تزعق فيه ؟
اشمعنى لما السواقين بيبهدلونا بنبقى مغلوب على أمرنا ومساكين .. وبنقول السواقين وحشين ومحدش بيبق معاهم بكلمه وبنقول لو كانوا محترمين هنعاملهم باحترام!!..
طب لما يكون السواق كويس بقى .. خليك كويس معاه .. ليه تستغله؟؟!!.. وليه تعامله وحش؟؟!! ..
قال النبي صلى الله عليه وسلم "ليس منا من لم يرحم صغيرنا ويوقر كبيرنا"
والسواق وقر الكبير والراجل محترمش الاصغر منه .. يبقى مين الاحسن السواق ولا أبو بدله ؟؟
هوا غلطان انه مشخطش في الراجل ابو بدله وعامله زي الزفت لان فعلا مينفعش معانا غير كده ..
ليه لما بيبقى في ايدك حاجة او ورقه بترميها في الشارع؟؟!!.. حطها ف جيبك أو امشي بيها لحد ما تلاقي زباله .. ولو حكمتك الظروف وخلاص محتاج تسبها إركنها على أي جنب ساعتها تكون عملت إلي عليك ..
ليه بتشتكي من وساخه الشارع وانت موسخه؟؟
ليه في اي حاجه بتنتقدها لما تكون في موقف قوه بتفتري رغم إنك كنت بتنتقدها بنفسك زي سواق الميكروباص المحترم إلي بتنتقده واول ما تشوفه محترم تعامل انت زي الزفت ؟؟..
والله العظيم إحنا فعلا نستاهل البلاوي إلي علينا ديه كلها
إلا حتى أبسط أنواع المعامله من لو سمحت وشكرا ومن مفضلك مش بنقلها لبعض!!..
كنت مسافر عمره .. وحصل خلاف ببين الجروب بتعي وما بين منسقي الرحله .. فانا اتصلت بالمنسق وقلته حضرتك كذا كذا كذا .. بعد ما قفلت واحد من الجروب وكان راجل كبير وعنده احفاد قلي وكان في قمه الاستغراب والضيقه مني:
-"انت ليه بتقله حضرتك؟؟!!.. ده راجل قله واحنا في حجات نقصانا بسببه!!"..
فما كان ان رديت عليه اني متربتش على كده ده راجل اكبر مني ولازم احترمه حتى لو مختلف معاه والراجل مقلش لا ووعد انه هيحل الاشكال ؟؟
يعني ايه المشكله حتى لو إختلفنا نحترم بعض؟؟ ..
ليه في ناس مصممه تكتب على الحيطان .. ليه في ناس بتذاكر بالقلم على كنبه الاتوبيس ؟؟
ليه أصلا مش بنحترم بعض ..
قريت في مدونه زميل لي (غالبا محمد جمال) .. إن احنا محتاجين قنبله من بتوع هيروشيما تنضف كل حاجة وتطلع ناس نضيفه ..
ربنا يهدينا ويسامحنا على أبسط قواعد الدين عندنا إلي مش بنلتزم بيها وانا اول الغير ملتزمين بالاخلاق للأسف.."الدين الأخلاق" ..أنما الامم الاخلاق مابقيت فان هم ذهبت اخلاقهم ذهبوا..
Posts
10 Comments:
معاك حق يا مبارك
فعلاً كل واحد بقى بينتقد الناس اللي حواليه وينسي انه ممكن يكون زيهم واسواء احياناً
لما بنحكم على سواق ميكروباص انه عصبي وبيزعق وبيشتم مبنقدرش قد ايه الراجل ده طلعان عينه فالزحمة والبهدلة
الراجل ابو بدلة اللي بتقول عليه
الله اعلم وهو نازل من بيته حصله ايه
مش يمكن صحي لقى ابنه عيان ولا مراته بتموت ولا اي حاجة تانية مخلياه متعصب
طبعاً اللي اخلاقه كويسة بيحاول يحافظ عليها حتى فاصعب الظروف
بس المشكلة الحقيقة ان كل واحد بيدي لنفسه الحق انه يحكم على بقيت الناس
والحقيقة ان لو قنبلة اتفجرت زي ما بتقول عشان تنضف الدنيا اعتقد اني شخصياً مش هبقى بعيد عن الناس اللي هتتشال عشان الدنيا تنضف
المشكله كمان يا باشمهندس ان الناس مش بتقدر ظروف بعض ولا حد بيحط نفسه مكان حد... أنا بتقابلني مشكلة الفكه دي وبشوفها كتيير بين السواقين والركاب بصراحه انا بكون حريصه جداً جداً اني يكون معايا فكه علشان ماليش ف الكلام ده كله وبكون عارفه ان الصبح مش هيلاقي فكه أكيد ولا حتى هعرف أقوله هات الباقي وبخاف مايسمعنيش كمان كذا سبب يعني فبحرص أوي على موضوع الفكه حتى ف المترو بحب أخد معايا فكه بس المره دي علشان أغلبهم بيدوا الباقي ناقص ومش بيراعوا ربنا وبيكونوا عارفين كده
سيبك من كل ده والفكه دي سواء السواقين ولا الركاب صعبانيين عليا بدماغهم دي والله مع ان المحترم بياخد حقه بالذوق برضه يعني فيها ايه لو بدأ كلامه بذوق عن كده ماهو بصراحه السواق مش شغال عنده برضه ده واحد رزقه باليوم ومش هياخد معاه فكه ع الصبح كده
بجد بجد زي مانتوا بتقولوا عايزين قنبله علشان ننضف
على فكره تقريباً دي تالت مره تتعاطف فيها مع سواقين الميكروباصات :-?
بجد يعنى المشكلة ان محدش بيحط نفسو مكان التانى
والواحد يفضل ينتقد كل الناس وهو فيه بلاوى كتير
@5aled
وانا هتشال قبلك بتفس القنبله علشان يمكن اكون انا سبب كبير في الي بيحصلنا ده
@Re7ab
هوا مش بتعاطف ..لكن انا شايف ان التعميم عليهم بالسوء بيحكم عليهم بالاعدام غالبا .. فبحاول مكنش عنصري مش اكتر
عامه ممكن اهاجمهم برضو.. الله اعلم ..لكن هما متبهدلين خلقه مش ناقصين ابهدلهم
البت المشمشية حلوة بس شقية
معاكي حق .. انا حتى دلوقتي بنتقد في البوست .. هل نقدي ده صح لمجرد إني انا الي نقدت؟؟
اشكرك
أعتقد انها فى الاول وفى الاخر مشكلة تربية.. لأن اللى اتربى على انه يحترم الناس صعب جدا يبقى غير محترم, وللأسف احنا فى زمن الاحترام فيه بقى عملة نادرة.
@MaNoOoSh
صحيح .. تربيه البيت والشارع والمجتمع .. التربيه على عدم التعميم
تحياتي
انت معاك حق في كل شئ
بس عارف بالنسبه لسواقين الميكروباص نادرا وواحد في الألف لما تلاقي واحد منهم بيتكلم باحترام
فتلاقي الراجل ده خلاص يا غعيني فاض بيه الكيل و بقي متسستم علي انه بيكلم سواق ميكروباص
بس
@koukawy
جايز جدا وجايز يكون متعكنن من البيت
بس اتمنى اننا قبل ما نعمم نقيم
اشكرك