استيقظ الاستاذ "شحات" على بصيص من ضوء النهار-شفت بصيص ديه جامدة ازاي؟!! اوعى- وشعر ان اليوم سيكون جميلا ورائعا .. وأنه سيكون رائعا للعمل والابداع .. ولذلك لف الروب الحريري حول جسده .. ووقف قليلا يتابع زقزقه العصافير في البلكونه .. وقد سر عندما وجد أن مراته الحسناء قد وضعت له الباتيه والباتون ساليه والتوست المغطى بالزبد الطازج بجوار النسكافيه والجريده .. فقال وهو يتمتم دعاء الاستياقظ الذي تذكره الان فهو انسان(بيخاف ربنا) أن "الحمدلله الذي احيانا بعد موتنا وإليه النشور" .. ثم جلس في البلكونه المطله على حديقه فناءه الخلفي يأخد افطاره ويلقي نظره على سيارته ال BMW الجديدة وهو يقول "الحمدلله"- مش قلتلك الراجل ده بيخاف ربنا -
ثم يدخل إلى الحمام ليستمتع بالجاكوزي وينضف جتته.. ويسر لمشاهده ورقه جميله معطره عليها "صباح الخير يا حياتي أنا في الصالون"
وبعديها يلبس الروب اياه وينزل علشان يشوف مراته والاولاد .. ينزل منين ؟؟من الدور التاني طبعا هوا مش ساكن في فيلا؟؟!!..
-"شحتفة" .. "شحتفه" .. إنتي فين يا حياتي؟ ..
ترد عليه وهيا لبسه الروب ولفه شعرها علشان هتعمله ضفاير ..
-أنا هنا بفطر الأولاد ..
يروح بكل حنيه ويبوسها من جبينها ويقلها "بونجور يا حياتشي" ..ويقعد على السفره علشان بفطر مع أولاده تاني (أما عالم طفسه صحيح!! إحنا لقيين ناكل؟؟!!)
ويبدأ يتكلم ..
-هاه ياشحاته عايزين نشتغل بقى يا حبيبي .. اليومين دول مفيش فلوس .. احنا الشهر الي فات جالنا من البزنس 20 ألف جنيه بس .. مش معقول غلو الأسعار ده كله .. الأزمه الإقتصادية العالميه وهبوط البورصة قللت إقبال الناس على البزنس بتعنا..أنا قناه الجزيره عملالي رعب بالاخبار الاقتصاديه الي فيها !!!
-ما أنت عارف يا بابا أنا لسه عندي 6 سنين ويا دوب الناس بتديني حق باكو مناديل ..
يرد أبوه :
-مهو أصل أنا مش عارف انت طالع زير لمين .. لسه لغايه دلوقتي بتشحت في السيده زينب .. علشان تلملي الأكل بتاع الندور وشويه جبنه وحبه فكه؟؟!! وهمك كله على بطنك!! لحد ما بقيت قد العجل كده..وقال ايه رايح تشحت بحظاظه!!! .. الناس تقول علي ايه؟؟ معرفتش اربي شحات صح؟؟!! .. في شحات لابس حظاظه؟؟ انتي بشحت على الموضه ..
يقوم الابن يرد:
طب أعمل ايه يا بابا .. مش عارف .. بلبس اليونيفورم المقطع وبمضي حضور وانصراف علشان تتأكد إني بخرج وأرجع في المعاد ..
يعتدل الأب في جلسته ويقول:
-أنت تاخد ورق جميعه "مرسوله" الخيريه .. وتشحت على انك واحد منهم .. وتلبس كويس هتلم قد كده..
تقوم البنت الاخت "شحتوته" ترد:
-لا انا هاخد الورق ده أنا عامله ضوفري ومش هبوظهم بنبطشيه السيده عيشه.. مليش دعوه ..
ينفخ الاب ويقول:
أووووووووووف.. طيب تروح النهارده في مأمورية البساتين .. في مقام هناك روح اشحت عنده ..
-أوه لللا؟؟!!!!!!!
ديه الام طبعا..تقول "ياي" وهيا قرفانه وتقول "ايه ده .. ايه الكلمه البلتشدي ديه؟؟!! تشحت .. اسمها تسترزق يا شحات"
-طيب يختي ..(طبعا ديه من الأب بنظره قرف وكانه هيقول نسيتي القله الي كنتي فيها انتي وامك)
يكمل القائد العظيم .."يلا يعيال روحوا شوفوا شغلكم على ما أروح انا كده لكذا جمعية خيريه وكام جامع نسجل اسامينا علشان ناخد مساعدات لسه عايزين نجيب شليه في بوتو مارينا..يلا ادعوا معايا .. اللهم وسع في رزقنا وقنا شر المال الحرام .. يلا يا واد انت وهيا" ..
كله يقوم وتقوم الام "شحتفه":
"طيب يا حبيشبي اسيبك أنا علشان عندي تشدريب في النادتشي النهرده .. وبعديها هعمل شوبينج ..شاو"
تابعني
Posts
Comments
استحملوا غلاستي
بحبهم .. بوستات بحبها
تصنيفات ما كتبت
- أدب (2)
- أمل (6)
- تاجات (3)
- دين (4)
- شوية أفكار (4)
- كلام جد (13)
- كلام في نفسي (7)
- كلام لذيذ (17)
- من ما قرأت (1)
- مناسبات (4)
- مواقف (2)
Followers
16 Comments:
مش عارفه ليه بشبهه على كلمة "ياي" دي :-?
أنا بصراحه مش بثق ان كلهم يكونوا مش لاقين ياكلوا كده .... وساعات بحس انهم أغنى مننا (بفلوسهم طبعاً ) والغنى غنى النفس أكيد
أعتقد ان ... الفقير بيكون عنده عزة نفس بتخليه مش بيمد ايده لحد حتى لو الجوع هيموته + ان فعلاً وف مصر بالذات ماحدش بينام من غير عشا يعني ماحدش بيموت من الجوع ... وربنا بيرزق ....
وحسنه قليله تمنع بلاوي كتيره ... لا لا بجد .. المهم المهم اني بضايق من اللي يمد ايده من غير مايسعى على رزقه
يالا كفايه رغي بقى :)
(....يحسبهم الجاهل أغنياء من التعفف تعرفهم بسيماهم لا يسئلون الناس إلحافاً....).
البقرة 273
بوست يشل
في ناس غنية و مستهبلة كده في البلد؟
عايزة اقرا الوش التاني من القصة اللي صحي لقى المية مقطوعة و مش لاقي حاجة يفطرها و لا شغلة يشتغلها
ساسبنز يعني
اوروفوار
أولا مبروك النيولوك بتاع البلوج ده
يمكن أنا قديم شوية بس أنت عارف الظروف
بجد بوست جامدة ما شاء الله عليم عرفت تحبك القصة وتودي دماغ القارئ في حته تانية لحد ما كشفتله الفكرة
بس انت طولت نسبيا بعد ما كشفت الفكرة
يعني كشف الغكرة ده المفروض يكون أقصر شوية نسبة إلى طول القصة
بس برضة عجبتني أنت موهوب يا كابتن :)
حبيبى وحشتنى يا مبارك,مقالة جميلة
و لى نفس رأى نبيل "
انت موهوب ياكابتن
:D
قصة حلوة يا بوحميد
هوه ده الشغل اللي ماشي في البلد :)
السلام عليكم
ايه النيو لوك الجامد ده
مبرووووووووووووك التمبلت بجد جميل و رقيق جدااا
كنت عايزة اعلق علي البوست اللي فات بس للأسف جيت متأخرة كالعادة :D
و بخصوص البوست ده ,,
فالأستاذ شحات ده بقي كتير في بلدنا جدااا للأسف
و مبقتش تعرف تفرق بين اللي محتاج فعلا او اللي بيدعي الحاجة
ربنا يهدي كل المسلمين يارب
طريقة عرض متميزة
سلام :)
@Re7ab
كلامك صح تماما ..
المشكله ان الواحد ممكن يعدي قدامه واحد محتاج ويكون عايزه يديله بس مش عارف ده بيمثل زي الناس ديه ولا لأ..
وبسبب كده ممكن واحد يكون محتاج مساعده ونساعدهوش علشان كده
ربنا يرحمنا ويهدينا
@BastoKKa
مش لازم تقريها .. بصي من البلكومه بس هتلاقيهم كتير اوي
نورتيني
@Nabil
الله يبارك فيك وجودك احلى من شكل البلوج
منورني انت بس يا نبيل ..ومبروك الخروج من الجيش
تحياتي
@Tifa
حليب هرتي
يا ابني شهادتك ديه وسام على صدري
ربنا يخليك يا طفطف ليا
@sa3ed
هوا ده الشغل الي ماشي في البلد ..
ان شاء الله ربنا يوسعها علينا ويشغل الناس كلها
@Bongo
ربنا يخليكي ..ده من ذوقك بس
المكان الي تحبي تعلقي فيه علقي مفيش تاخير وانا براجع كله..
البلوج بلوجك
امين يا رب
..
انتي جبتي المفيد
و مبقتش تعرف تفرق بين اللي محتاج فعلا او اللي بيدعي الحاجة
تحياتي
أحمد
ازيك يا حنون و مبتحبش الجبنة
مبروك على النيولوك
و عقبال ما تجهز شقتك يا رب
عيد سعيد عليك يا عزيزى
و بقيت كسلان و مطنش مدونتك كتييير
مفتقدينك بس مقدرة إنك ممكن تكون غرقان لشوشتك إنشغال
أنا قولت أعدى اطمن و أقولك
كل سنة و إنت طيب
@فاتيما
يا أهلا بيكي يا فطوم
بجد ليكي اشتياق كبير
بس اعذريني انا مشغول في الشغل لعنيا
اشكرك بجد ..
تحياتي ليكي
هههههههههههه
تخيل لطيف
@koukawy
شكرا ..
كلك ذوق
البلوج نور