جله الحيا في هذا الزمان اختفت .. واصبحت تمارس من قله قليله فاسده جليله الحيا زيي ..
وأسوأ من انك تعمل حاجة جليلة الحيا .. ان الناس تشاور عليك وتجولك "يا جليل الحيا!!"..
لاني فعلا بعمل اكتر حاجة جليله الحيا لما اكون عايز ارتاح .. ولازم اعترف بكده واواجه نفسي قدمكم بده .. لاني مش هحل المشكله الا لما اعترف بده .. ولازم اصارحكم لأني ياما بحكي ليكم ..
بعادتي اني لما اتضايق .. فعندي مكان بروحه برتاح فيه ..
ولجله الحيا عندي .. أجد الراحه على كوبري قصر النيل .. وديه جله حيا .. حيث لابد ان يلتزم المرء في كل مكان بقواعد وعادات المكان والمجتمع ولكني اضرب بالعادات والتقاليد والادب عرض الحائط ..
بدخل كوبري قصر النيل وبلاقي نفسي شاذ عن كل الناس .. كل واحد واخد الحته الطريه بتاعته وواقفين يتودودوا ..واتنين بيقهقهوا .. والبعض مريح ايده على بعضه .. وكله .. كله ماسك ورده..
بدخل الكوبري ..يأتيني إحساس اني البطه السوداء ..وهذا حق .. انا لا معايا حته طريه ..اصل ربنا لسه مكتبليش خطوبه ولا جواز ولا حتى جو كأضعف الحالات .. مهو واحد زيي ملوش في نظام الجو والحتت الطريه الغير مرخصه ديه ..
ولا حتى بتكسف على دمي ومعايا ورده .. ولا محترم نفسي وعمال كأضعف الايمان امثل اني بكلم الحته الطريه بصوت عالي في النوبايل..
وشوفوا جله الحيا ..
شوفوا وصلت لدرجة ايه ؟؟!!!!!..
داخل في ايدي كتاب!!!!! ..
بدخل بجله الحيا بتعتي .. وببجاجه لا توصف .. ادخل الكوبري .. واحس اني فعلا البطه السوده .. بدور على حد زيي .. جليل الحيا من غير حته طريه مرخصه او غير مرخصه ومن غير ورده .. مفيش حد غيري ..طبعا مش هدور على حد بكتاب لأن محدش فجر الفجور ده زيي ..ده انا خلاص من جله الحيا بحس اني هتسخط سرقوله الي انا مش عارف ايه هيا بالظبط!! ..
وعلى طراطيف صوابعي بدخل الكوبري بحاول اني اتلافى نظرات الناس التي تنعتني بجله الحيا في صمت كفيل بتحويلي الى عود كبريت .. واسمع وانا امر بعض العبارات التي تنم عن التذمر من وجود ناس بجحه وعينها تندب فيها رصاصة من امثالي ..فاسمع تارة:
"ايه ده .. اي قمه البجاحة وقله الحيا ديه .. وعندك عين تمشي لوحدك"
وتاره يقول رجل كبير في سن جدي الذي يمشي مع حته خشبه مرخصه غالبا في سن الضياع والهلاك:
"ايه الجيل المهبب ده .. وماسكين كتب .. ده انتوا هتروحوا من ربنا فين؟؟!!"
وترد حتته الطريه .. طرية ايه بقى ..الناشفه متعاطفه :
"مصيره يكبر ويعقل ويلاقي حتته الطريه .. مهو احنا برضوا كنا زيه كده .."
يرد مستنكرا :
"مش بكتاب يا تفيده مش بكتاب"
بينما يعدي الحنطور على الكوبري وهوا يسمع "واركب الحنطور .. درجن درجن .. واتحنطر .." ويلقي نظره سريعه بمعنى "بطل جله الحيا ديه وانجز خلينا نستنفع من وراك وتركب انت والحته معايا"..
بينما اكون واقفا في ركن اسود اتفادي فيه نظرات الناس .. واتلافى احساسي اني واقف عاري في وسط الجسر .. يعدي عليا شباب من معارضه مصر الذين يحاربون الفساد ويحاربون الحكومه ويحاربون بدورهم -طبعا - جليلي الحيا امثالي هيا جت عليا يعني ويسيبوني .. وينظرون نظره شنيعه الي كلها غضب .. ليتوقف الريق في حلقي.. ويفعلون المحظور ..يبصقون علي !!! .. ولكن الهواء يخلي البصقه تنزل في النيل .. اتعصب .. ويغلي الدم في عروقي .. ولكن لما اضرب بعيني كده اشوفهم عشره بقول "المسلم يحسن الظن في اخيه .. هوا مش قصده .. هوا كان قاصدها في الميه .. وخلي ليلتك تعدي .."
ولا تخفى عليا نظرات الشفقه من بعض الملتزمين المحترمين الذين يقولون ..
"مسكين ..حالته تقطع القلب .. ربنا يهديه .. ويلاقي حته "
حيث يهزون رؤوسهم في تعاطف..وهم يقاومون رغبه جامحة في اخراج ربع جنيه مخروم ويدهوني علشان اقعد في حته ناشفه تانيه..
ولكن لحسن الحظ يتراجعون عن ذلك .. ويريحوا على بعض تاني .. عندها افهم انه خلاص .. حنفيه التعاطف اتقفلت يا مدهول وشفلك حته ناشفه تانيه تقف فيها .. وينتهي عندي الامل الأخير بهذا الصد من ان يراعيني ويعذرني احدهم ..
عندها .. أجد نفسي لا اطيق كلام الناس ..
وألاقيني اصرخ في هستريا .. ده كتير .. كتير ..
واجري ..
مزيد من نظرات الناس .. واتعثر .. ويقع الكتاب .. واعدل النظاره .. واترك الكتاب ..
واصل الى اول الجسر واهبط على قدمي ..
عندها افهم انني مش لوحدي في المجتمع وأن المجتمع لابد ان يقاوم امثالي .. جليلي الحيا !!..
واصرخ وانا جالس على ركبتي (المشهد بكاميرا من فوق) واهمس في نفسي "يا جليل الحيا .. مصر بخير!!"
Posts
25 Comments:
الله الله .. مدونتك رائعة وكلماتك تلقائية وتمس القلب .. خالص حبى
أحمد أفندي مبارك
إزيك يا مون بيه
و إخبارك إيه؟
ليك شوقة يا ماكي
بس إيه ده يا أحمد ده احنا طلعنا جلالات الحيا زي بعض
بس انا عمري ما أقدر أعمل عملتك التريكيوااز دي
كتاب ؟!!.. كتاب يا أحمد
يا عينك يا جبايرك يا أخي
بس مش عارف كده يا أحمد ادتني احساس و انت داخل كوبري قصر النيل إنك داخل شقة مفروشة "مشبوهة" بس طويلة شوية
و أنا من موقعي هذا و من مدونتك هذه أحب أوجه رسالة إلى كل الحبيبة و غير الحبيبة الموجودين على كوبري قصر النيل
يا بختكممممم يا ولاد المحظوظة
السلام عليكم ورحمة الله وبركاته
هههههههههههه
تستاهل حد قالك تروح الاماكن دي لوحدك
وبعدين احمد ربنا ان العيال بتوع المعارضه اكتفوا بالتف وماشالوكش انت والكتاب وحدفوك في النيل
كل منايا ان الناس جليلة الحيا يبطلوا حقدهم الدفين علي الناس المحترمه
:-)
سلام
صحيح سبتلك رد في البوست اللي فات
ابقي افتكر تقراه
يالهوى ياخراشى يافضيحتى يامصيبتى هيا حصلت كدا كمان كتاااااب مره واحده لا دا انت محدش بقى عارف يلمك خالص قدرت تعمل كدا ازاى
هههههههه بوست رائع بجد وموتنى من الضحك بس انت ايه اللى لعب فعقلك وخلاك تروح هناك
اول زياره ليا هنا وان شاء الله متكونش الاخيره
خالص تحياتى
ماشى حاضر هدخل بقلب جامد اهو
جزاكم الله خيرا لهذة الثقة
ههههههههههه
هو فعلا حسيت انى هدخل بقلب جامد وثبتنى بالكلمتين اللى فوق دول
ده تالت موضوع اعلق فيه
وبرضو عن الحياء والاخلاقيات!!!
ما علينا
والله انقلب الحال
واصبح منظورنا للاشياء الصحيحة خطأ وما شوه هذا الا نحن وبايدينا
يا اخ احمد
انت الصح
وسر بكل فخر
وانظراليهم نظرة المشفق عليهم من حالهم
وفى داخلك تدعوا لهم بالهداية
وفقنا اله للخير جميعا
(ممكن تغير لفظة الحتة الطرية)
اكتبها اى حاجة
ده اقتراح ليس اكثر
تحياتى
يا خبر
وازاى ساكت على نفسك كده واللى رايح واللى جاى يتعجب عليك
انا شايفه اننا نلم بعض ونعمل نقابه لجللات الحيا تلم الناس بتاعه الكتب والنظارات واللى ملهمش فى الحتت الطرية ولا ركوب الحناطير والورد والكلام ده كله
ونشوف اى مكان كده مستور نجتمع فيه ونناقش حالتنا الكرب دى
تحياتى لك
ههههههههههه مع اعتراضى على بعض الالفاظ بس موافقك يا ريس على الباقى هههههههههههههه
وبعدين يا ريت كل الاولاد يكون جلالات الحيا ههههههههههههه
تصدق بالله
عملتها مره أنا واصحابي البنات وروحنا هناك وكانت ليله ما يعلم بيها الا ربنا :)) مانا قلتلك
والمره التانيه كنت في مشوار وكنت جنب الكورنيش بس العصر كده مثلاً وماكنتش عارفه أمشي بجد بجد كنت مكسوفه وأنا ماشيه لوحدي .... مش علشان حاجه الا اني كنت مكسوفه للناس اللي هناك... كنت بقولهم هو انتوا برضه مش معادكم بليل ولا ايه ؟؟؟ وكنت حاسه اني بجري مش بمشي
بس انت زودتها شويه :)) كتااااااب يا أحمد ..استغفر الله العظيم :))
والله نفسي أبقى براحتي كده واروح هناك واقعد بمزااااج بس لوحدي برضه لا يجوز
يبقي انا بقي جليلة الحيا ذيك لاني بمشي بالحتة الخشنة المرخصة بتاعتي بس من غير ورد بس معانا العيال بيتنططوا حوالينا
اما جلة حيا بصحيح
لالالالالالالالالالالا
ايه ياحمد لسه لحد دلوقتي ملقتش الحته الطريه بتاعتك
انا سمعت ان في في القاهره حته اسمها شارع الهرم تقريبا دا في حتت بتترمي
انا مليش دعوه ياعم انا بمسمع من الناس بس
ربنا يبعدنا عنهم انا معنديش حتت طريه الحمد لله يعني احنا اخوات في الشقاء
تحياتي
@إيهاب رضوان
انت الي كلك ذوق .. ومدونتي هيا الي نورت بوجودك عندي
منورني يا حبي
@nigro
روح قلبي وحبيبي
مشبوهه ايه .. دا انا الي شبهت المكان
داخل بكتاب .. ديه شبهة جبتلي الكلام
ومكن مكاني هذا هقعد معاك واقول
زيك بالظبط
عقبال ما نفرح بيك
:D
تحياتي
@خمسه فضفضة
وعليكم السلام ورحمة الله وبركاته
اتريقي يا دكتورة اتريقي
يعني ايه حد قالك تروح لوحدك .. ان شاء الله هتجوز واخش احط صباعي في عين الناس كلها
وطبيعي اني احقد دلوقتي ..
------
اشكرك اوي على ردك عليا في البوست الي فات انا قريت ردك ورديت عليه
اشكرك جدا
:)
@سمر الشافعي
هعمل ايه .. بحب منظر الميه في المكان ده
ايه الي رماك على المر .. الي امر منه
تحياتي
@Shaimaa Samir
مهو المشكله اني الصح
:D
بس المشكله لو مشيت بكل فخر هييجي بتوع المعارضه يكسروا الفخر ده
:)
كويس انك قلتيلي الاعتراض..
هوا معاكي حق
انا عاده بحاول اخلي البوست كيان واحد في الفاظه وممكن اذكر لفظ علشان حته معينه
فكلمه حته انا مقصدش بيها البنات بس .. لا والولاد كمان..
+
اني دخلت كلمه حته طريه علشان اعكسها في مكانين
اشكرك لصراحتك واوعدك المرات القادمه مش هكتبها
تحياتي ليكي بجد
@اهو ده عيبه
صدقيني النقابه ديه هتلم بالظبط ميه عضو ..منهم الرئيس ونائب الرئيس .. والمستشارين ..والعاملين ..والموظفين وخمس اعضاء
:)
ومش هيلاقوا مكان يقعدوا فيه غير في سوق الجمعه
:D
منوراني كالعاده
@appy
ايه يا آبي .. مش عايزاني اتجوز ولا ايه؟
ربنا يكترهم ويعقلهم برضو
:D
عامه رجعي ردي على شيماء وتقبلي اسفي الشديد
:$
تحياتي
@re7ab
لا يجوز
:D
ايه الاحكام ديه ..
وهوا يعني يجوز الي انا عملته ده ؟؟
ادخل بكتاب
منوراني
:)
@المفقوعه مرارتها
لحسن حظك انتي مش جليله الحيا خالص
ده انتي ماشيه مع الحته الطريه المرخصه
وحقك تبصيلي زي اي حد تاني كان بيبصلي
ربنا يجعلنا زيك
ويبارك في اولادك العسل دول ويخليهم ما شاء الله عليهم
تحياتي
:D
@GeHaD
خوفي من الناس الي بتسمع ديه .. بتسمع يا جهاد حاجات غريبه
..
ربنا يكتبلك العروسه بنت الحلال يا ابو جهاد
..
عملت ايه في امتحاناتك طمني
تحياتي
بص يا احمد إنت أخويا الصغير
و هكلمك بصراحة
الكلام اللى بتقوله دا ناجم عن حقد مترسب فى اللا شعور و محدش يسألنى يعنى إيه عشان أنا شخصياً موش فاهمة
هااااه
لأن سيادتك موش عارف تعمل
زى العالم دى
و معندكش حتة إسمها إيه دى ...
و إيه؟؟
!! مرخصة
هوه سلاح يا بنى ؟؟
و بعيييين يا حمادة
الكوبرى معمول لهدفين أساسين
1- عبور المشاة و السيارات
2- وقوف الحبيبة يشموا هوا ويحبوا بعض و يغيظوا فى اللى ماشيين
يعنى لو كانوا لقوا مكان تانى غير الشارع يحبوا بعض فيه ببلاش كانوا هيقولوا لأ؟؟
و بعدين تعالى هنا
لازم أنت رآخر تمسكيلى كتاب عشان تقراه على الكوبرى ؟؟
حبكت يعنى القراية هناك
يا أحمد ربنا يكرمك بحتة بنت حلال مترخصة من أبوها و امها و المجتمع
و مسموحلك بإقتنائها و التلويح بحبها فى وجوه الآخرين
على كوبرى قصر النيل
و ساعتها هتلاقى شاب لطيف كدا
ويتصادف إنه جليل الحيا ماسك كتاب معدى من جنبك و إنت تشاور عليه
و تقول للعروسة
شايفة جليل الحيا اللى هناك دا
ماسك كتااااااااب
@فاتيما
انا ان شاء الله لمت ربنا يكرمني دا انا مش هشاور على الي زيي بس .. دا انا هغلس وهرخم اوي
معلش لازم اخلص الي كان بيتعمل فيا
:D
تحياتي
مش ممكن اية يبنى دة ,انا بعترف انك كاتب اسلوبة مشوق
انا مكنتش اعرف كدة , اومال كنت بتخنقنا لية فى الكلية
:D
انا زعلان منك لانك سافرت من غير متكلمنى , انت عارف انى نسااى
سلام يا جميل
@tifa
ده من ذزقك يا عسل .. وحشتني اوي يا طفطف
وبعدان اخنقكم مش مشكله انتوا .. لكن الناس الي بتقرا ديه ذنبها ايه
لا يا طفطف انا لسه مسفرتش
ومقدرش اسافر من غير ما اقلك
:D
نورت يا حبي