(هيثم) قاعد على القهوة مع صاحبة (تامر)..و(هيثم) كان خلاص إتجوز (منى)..
وتبص على صحبنا (هيثم) منفوش الشعر..عينه منفوخة..وفي اشتباه إنه مضروب بلحة على دماغة..و(تامر) جايب ليه كوبايه لمون..وبيقله..
"خلاص يا هيثم بأه..ما توحد الله مهياش أول علقة..اشرب اللمون.."
يرد (هيثم)..وخلاص وصل لمرحلة انعدام العقل وبدأ يخطرف بكلام مش مفهموم عن الجواز والمحروسة مراته::
بص يا تامر..يتوكس إلي بيقول إن الستات ينبوع الحنان والبتنجان..حنان ايه..حنان ايه إلي انت جاي تقول عليه..إلي قال كدة دة....أبسلوتلي..
انا كان مالي ومال الجواز ؟؟..ما أنا كنت عايش في بيت ابويا معزز مكرم.. ليه بس كدة؟؟!!.. دا إحنا بيطلع عين إلي خلفونا علشان نتجوز.. اتخرجت..وحوشت القرش فوق القرش.. حارم نفسي من كل حاجة..شقة وعفش وكل حاجة.. وقال ايه الوصايا العشر..
وصايا عشر مين يا عم؟؟!!..دة إحنا طول عمرنا بنعمل ليهم كل حاجة..حتى وإحنا صغيرين ..كنا نروح انا ومنى عند عم (حسن) البقال يطلع الواد (كفته البلطجي).."هات الفلوس ياد"..
"اجري يا منى..إجري يا منــــىىىىىىىىىى............."
و.. ديب.. طراخ.. بوم.. شوت.. تراتراتاراتاراتاراااتاراا..خلاص يا كابتن..انتا مش لاقي غيري..خلاص يا كفته بيه..
ورغم كل دة وأنا مدغدغ أرجع وأنا بقول الحمدلله انها جت فيا..وراجع متوقع بتصور الأطفال إني البطل المغوار إلي حماها من الأطفال الأشرار الوحشين..ونافخ صدري راجع متلهف على الهتافات..ومتخيل وهيا بتجري عليا زعلانه عليا..وبتقلي اوة ماي جاد..انت الهيرو بتاعي..ألاقيها.."جبت العسلية؟؟!!!"..وأسكت واقول "ناقصات عقل ودين.."
(كنت صغير وعارف ناقصات عقل ودين متسألش إزاي..)
وأروح تاني علشان أجيب العسليه ..وربنا يستر..
ليه بس بيعملوا فينا كدة؟؟؟؟!!!..
وبعد ما تحس إنها طولت في الجواز..وعايزة تتجوز..مهو كل راجل قدامه 6 بنات دلوقتي..فيهم المتجوزات..وفي رجاله مش لقيه حق الجواز..يعني ممكن تقول إن كل راجل مش متجوز قدامه 4 مش متجوزات..
تقعد تلف وتدور وتتمحلس لحد ما تجر رجلك وتحسسك إنك (ليوناردو ديكابريوا)..انت الراجل الكبااااار..وتشتغل بالعنجليزي ..والرقة تنزل عليها معرفش منين..وفجأه تتحول أبويا إلى بابي وأما - ياريت ماما - إلى مامي بمعجزة ما..
(مامي يا بنت تفيدة دة إنتي كنتي بتكلي المش قبل الشاي بلبن..وكنتي بتقولي سندوتش بالضآلين..)
وتلاقيها فجأه كل شوية ترن..ومسجات حب وغرام .. و "يا ملقح جوة في قلبي وأنا قلبي مش متين..من حبك جالي سكر إديني أنسولين"..
المهم إنك بتلاقي نفسك is ريالتك على صدرك ..وبتسمع (إليسا) كل يوم وتغني - لو تعرفوة لو يوم شفتوة كلموة -..وأنت يا عيني قلبك هيتقطع من الرومانسيه ..وتغلط غلطة عمرك ..
وجاي وأنت عندك 27 سنه جارر والدك إلي عمال يضرب أخماس في أساداس وبيقول.."أنا ربيتك على كدة يا هيثم..أنا مش ربيتك على إن الجواز فاقه..مش مكفيك إلي بتشوفه من أمك الله يولع فيها..رفعت إيدي ودعيت عليك يا هيثم يا ابن زينب فتحي.."
ورغم كدة تعاند وتقول..انا راجل..بابا دة عايش في زمن قديم..أنا رايح أخطب(أنجلينا جولي) تنتظرني على الابواب..أنا جاي..يا حبيبتي..أنا (براد بيت) الحته..وسع يا جدع..
وتكون لابس البدله إلى واخدها من (سنجة) المكوجي ساعة كدة تقضي بيها المشوار..وواخد علبه شوكالاته..وواخد أبوك الغلبان معاك..وتدق الجرس..
و(أم منى) "أهلا أهلا اتفضلوا"..وتخش وإستقبال إيه..وإشي شربات ..وإشي بيتيفور من إيد(منى)إنما ايه..و(منى) أصلا بلا خيبة..أخرها تغسل كوبايه..
وانت خلاص هتموت..(إمتى أتجوز)..
وتخش المحروسة بسلامتها لابسه إلي على الحبل كلوة.. وجايبه الحبل كمان..وياه على الأحمريكا والأصفريكا..وأنت عمـــــ..حااااااااااااااااااااسب..
-"معلش أنا آسف مكنتش أقصد.."
وأبوك بأه :"مش تخلي بالك يا ابني وانت بتمسك الكوبايه..أديها اتكسرت.."
-"ما تسيبه يا (أبو هيثم) البيت بيتك متخفش هيدفع تمنــــ..أه قصدي البيت بيتك....هي هي هي هي هيأ ..هع هع هع.."
(أه يا وليه )
زيارتين كمان ..
"وجبت حق الشبكة..حق المهر..الشبكة دية مش عجباني..احنا هننزل نجيب العفش امتى..ايه ده؟ ..ايه دة؟..دة بلدتشي أوي.."
(بلدي إيه يا وليه..دة إنتي متجوزة على حصيرة بالتقسيط )
وطبعا حبيبه القلب..ملاك طاهر..ملاك بريء.."معلش هيا مامي كدة..معلش انتا هتتجوزني ولا مامي" .. وتصبر لحد متلاقي جيوبك مخرومة خالص..
وهيا شغاله "مشربش الأزوزة أشرب كنز أنا"..وتجيب الكنز..ويا ريته طامر فيها..
ووتتنيل وتتهبب .. وبعدين..
تامر يقلوة ..بعدين إيه يا هيثم؟؟
Posts
20 Comments:
أولاً أنا بعترض على الوصيه الخامسه
5. لو مبتعرفش تطبخ يا ابني..أو بتستهبل زي ما أمها موصياها..احبسها في البيت واطلب دليفري وجوعها..وهيا تتعلم الطبيخ وتمشي على العجين متلخبطوش..
ايه القهر ده !! ماهي لو مش بتعرف تطبخ يستحملها شويه ويجيب ديلفري ليها وليه :$:$:$ فيها ايه يعني ؟ لحد ما تتعلم
ثانياً: اسلوبك بجد تحفه:D:D:D
وأنا متفقه معاك تماماً ان كيدهن عظيم بس مش كلهن يعني :D
والله ربنا يكون في عون هيثم وأمثاله
بجد بيصعبوا عليه
بس كمل و قولنا ايه اللي حصل بعد كده
وبعدين يا هيثم ؟؟
يا ابني ..
ايه الكلام الكتييير قوي ...دا ...
:)
انا ورايا بلوجات كتير ..
لو ينفع تنزلها ملخص يبقي اريح .
:)
@Re7aB
يعني الراجل يطلع عينوة طول عمروة..ويدفع الي وراه والي قدامه ؟؟..ويشتغل طول اليوم..وهيا لسه هتتعلم؟؟
طب هيا بتعمل ايه اصلا؟ غساله اتوماتيك..غساله صحون..مكنسه بالكهرباء..مفيش عيال ..ومفيش مسح علشان سيراميك شوية ميه واقلب..طب هيا وراها ايه؟؟
لأ..يجيب دليفري.
:D:D:D
الرحمه يا بنات حواء
وشكرا على تقديرك معانتنا ..
:D:D
شكرا لحضورك وتعليقك
@Essawy
كلمتين بس يا حبي
إن كيدهن عظيم
اسلوب جميل
ياريت الحلقة الجاية تظهر براءة منى من تهمة ان كيدهن عظيم
عندي سؤال خارج المقرر
خريجي حاسبات تبع نقابة ايه ؟
تحياتي
@UNIQUE
يا أهلا وسهلا .. البلوج نور..
شكرا على الاطراء..بس يظهر الحلقة الجايه هتبقى مش على هوا ناس او ناسات كتير
:D
شكرا ليكي بجد
بالنسبة للنقابه..
احنا تبع نقايه العلميين..
واحنا على وشك نصدر نقابه لخريجي حاسبات بس في مشكله مجلس الشعب خلال ال 3 سنين الجايه
شكرا للإهتمام
كلام جميل والقصة شبه واقعية .. مش عايز اكتب تعليق الا لما اقرأ الجزء التانى .
بس هقول حاجة .. فى حد لما اقرأ القصة حد فكر ايه اللى يخلى البنت تبقى شرسة زى منى :)
بلاش اسبق الحوار يمكن تكون كاتب عنها حاجة فى الجزء التانى ..
وبماانى فى مدونتك واليوم هو رأس السنة الهجرية اقول لك عام هجري مبارك عليك وعلى اهل الارض جميعا
ايه ده كله ::D:D
قال غساله اوتوماتيك وأطباق ومش عارفه ايه ... لما هو غني كده يجيب دليفري بقى لاتنين ... مش طباخ أنا ديمقراطيه أهو ... أو بمعنى أصح مش بحب موضوع الطباخين ده
يابني ده أهم حاجه رضى الزوجه لازم يجبلها ديلفري علشان ترضى عنه :D:D
أنا مقدره معانتكم أيوه لكن كفايه اننا مستحملينكم ومستحملين التناكه بتاعتكم tenek
@جــــدو
جدو عندي في البلوج يارداله..
يااااه يا جدو البلوج نور تحياتي
خالد عيسوي نور البلوج
اينعم أنا لما اشوفك يا جدو هيبقى ليا معاك فيلم أكشن زي فيلم الرعب الي عملتهولي من ساعة .. بس على ماشوفك قدام الناس هحترم انك ال
Team Leader
بتاعي
...:D:D:D
طيب
وكل سنه وانت طيب يا جدو وربنا يكرمك..وربنا يطول في عمرك
هو الجزء التاني لسه تحت التصليحات..إلا ذلك الوقت .. اشوفك على خير
نورتنا يا خالد
@Re7aB
يابني ده أهم حاجه رضى الزوجه لازم يجبلها ديلفري علشان ترضى عنه
ايه الافترا دة؟؟يعني هيا تأكلوة رز من غير شعرية محروق وكل يوم مكرونه معجنه وبعدان رضى الزوجة
اه يابا.. يابا ياني
ههههههههههه
ظريف أوى يا أخ أحمد
ربنا يكرمك
فعلا
إن كيدهن عظيم
د.حمـــــاس
عاااااااااا
انا من صنف الحريم
لكن والله انا ماكنتش كدة لما هانى جه اتقدم
مش كل الستات كدة على فكرة
انا واحدة كنت مقدرة اوى ظروف جوزى اللى كان لسة خطيى وقتها وعملنا كل حاجة واحدة واحدة
ولسة بنحلم بشقة واسعة فيها بلكونة
باعتبار انى شقتى من غير بلكونة حاليا
طب اقولك على حاجة يا احمد فى ودنك
تعالى قرب علشان محدش يسمعنى
ولا اقولك مش هاقولك حاجة ان الله حليم ستار
بس بالمختصر يعنى انا ماكنتش خيخة وقتها
كنت بجد ست بمية راجل ووقفت جنبه كتير
واهلى كمان وقفوا جنبوا
مش كل الناس زى منى اللى انت كاتب عنها دى
بس اسلوبك حلو اوى
حضرلى بقى ربع جنيه حق المشوار من بلوجى لبلوجك
سلام
اختك خيخة
هههههههههههههههههه بجد اسلوب جميل ومضحك جدا
@Nabbil(ely 3ml Delete lel comment)
واهوا انت فاكر يا خويا انك لما تحط كومينت عندي وتشيلوة مش هاخد بالي منه؟؟
Thnx Nabil
وعموما الرد على السؤال بتاعك الي محدش يعرفوة غيري..
الزواج شر لابد منه
:D
نورت بكومنتاتك المحذوفة
@DR.HAMAS
يا أهلا بالناس الحلوين..البلوج نور
شكرا على الاطراء وعجبتني خاتمة الكومينت..درامية اوي
فعلا
إن كيدهن عظيم
د.حمـــــاس
:D
شكرا ليك
@ خـــــيـــخـــه
يا ترى دخلتي بأي رجل..ولا جيتي بمكروباص..
عموما البلوج نور..الله أعلم دة نورك ولا نور كشاف الميكروباص..
خليني ابص كويس..لأ نورك..نورتينا
والله بعد الي شوفته في البلوج بتاعك وخصوصا الفراخ الي بتختفي يخليني احس انك قبل الجواز كنتي زي منى او أقل شوية..
بس إلي أنا متأكد منه إنك كنتي جدعة فعلا..
عموما أنا مش عايز الربع جنيه..إبقي اخصمية من ال خمسة وسبعين قرش الي كنت هتدهمني حق الرجوع من البلوج بتاعك..كفايه خمسين قرش
:D
شكرا للزيارة
@زى الهوا
مغسي بكو ..
شكرا أوي ..ونورتينا عايزينك معانا على طول
:)
جااااااااااااامد فحت الحوار ده
والاجمد منه اني شايف تعليقات البنات فعلا زي ما هيثم قال
رقه وحنان وعمرهم مابيعملو الغلط
منتظر الجزء التاني بفارغ الصبر
سلامووووووووووووز
@Soooo
منور يا باشمهندس
مغسسسسسسسي بعنف..